Tjemenjača se najčešće javlja kod odojčeta do 3. mjeseca, ali nije neobično da se pojavi i kasnije u ranom djetinjstvu. Iako često zabrine roditelje, tjemenjača kod beba nije opasna niti zarazna.
Kako tjemenjača izgleda i koji su njeni simptomi?
Sadržaj:
Tjemenjača je upala kože, a javlja se u predjelima gdje se nalazi najviše znojnih žljezda (tjeme, obrve, koža lica, predio između nosa i usta). Ovaj problem karakterišu masne i žućkaste ljuspice na određenim predjelima kože. Iako može da izgleda uznemirujuće za roditelje, bitno je naglasiti da bebe tjemenjaču najčešće i ne primjete. Ona ne stvara nikakvu nelagodu, nema svraba i nije bolna.
Kod svake bebe tjemenjača se manifestuje na različite načine pa tako i različiti dijelovi tijela mogu biti zahvaćeni. Najčešće regije na kojima se pojavljuje su: tjeme, lice, obrve, vrat, uši, pazusi i prepone.
Šta uzrokuje tjemenjaču kod beba?
Tačan uzrok nastanka tjemenjače nije ustanovljen, ali za jedan od vodećih uzroka smatra se povećano lučenje ulja (sebuma) na tjemenu ili drugim regijama. Pojačano lučenje sebuma kod bebe uzrokovano je djelovanjem majčinih hormona koji su putem posteljice ušli u bebin krvotok. Liječenje tjemenjače nije nužno potrebno jer ona najčešće sama nestane nakon 6 do 12 mjeseci.
Kako tretirati tjemenjaču?
Svakodnevna higijena i njega je njabitniji korak u tretiranju tjemenjače. Pola sata prije kupanja namažite bebinu glavu (ili drugu regiju zahvaćenu tjemenjačom) bademovim, sezamovim, maslinovim ili kokosovim ulje. Tokom kupanja bebe koristite blage šampone po mogućnosti na prirodnoj bazi i lagano masirajte bebinom četkom kako bi se uklonile omekšane ljuspice. Potom glavicu operite još jednom, a po završetku kupanja lagano peškirom trljajte tjeme kako bi se pospješila cirkulacija. S obzirom na to da fontanela na glavi još nije srasla budite pažljivi prilikom masiranja.
Ne preporučuje se upotreba sapuna jer on isušuje i dodatno nadražuje kožu. Pored toga ljuspice koje se stvore na koži nikada ne treba na silu uklanjati.
Ključno je zapamtiti da je u liječenju tjemenjače bitno održavati kožu suhom kako ne bi došlo do sekundarne infekcije.
Ukoliko redovna njega i ovakvo tretiranje tjemenjače ne pokažu rezultate, konsultujte se sa vašim pedijatrom.
